جذبني جمالها - الـــبــــ(✍🏻) ـــــارت [ 1️⃣ - مكتملة | روايتك

_*البارت(1-5)*_ ♥️♥️♥️♥️♥️♥️♥️♥️♥️♥️♥️➖➖➖➖➖➖➖➖➖➖➖ ـ اوب اوب، شوف الجمل اللي داخل علينا دا يلا لف وشه عشان يشوف مين، بصلها وقلع النضاره كرم: اوووف، مين دي يلا احمد: مش عارف، اول مره اشوفها كرم: ازاي عدت من تحت ايدي دي، دي صاروخ احمد: استنى اسأل جمال، جمال، ولاا يجمال جمال لف وشه وجالهم جمال: اي يمعلم في ايه احمد: مين القمر دي جمال: انهي واحده احمد: ام جاكيت اسود دي جمال: ااه، دي بيان كرم: ايوا مين برضو، مشوفتهاش ف الجامعه قبل كدا جمال: عشان هي مش بتيجي كتير، يعني بتيجي تحضر وتمشي بسرعه غريبه احمد: ليه جمال: معرفش، بس دي بت مريبه بجد كرم: لا احكيلنا بقاا جمال: بص يسيدي، دي لسه ف سنه اولى، بس بت غريبه قوي، بتحضر كل المحاضرات، وتشوفها ف المحاضره تقول دي هتطلع عالِمه من كتر تركيزها مع الدكتور، المحاضره تخلص من هنا ودي تختفي من هنا، بتمشي بسرعه جدا وكإن في حد بيجري وراها، ف الاول محدش كان واخد باله قوي يعني بس دلوقتي الكل عنده فضول غريب يعرف هي بتعمل ايه احمد: ايوا ايه الغريب في انها تطلع مستعجله جمال: يبني بتيجي تحضر محاضرتين مثلا وف الوقت الفاضي تطلع من الجامعه جري، وقبل المحاضره التانيه بدقيقه واحده بتكون هنا كرم: ميهمناش كل دا، يهمني حاجه واحده بس، ان البت حوار جمال: لا حاسب، دي بالذات لا، لا يعني لا كرم: ليه يعني جمال: قِفل قوي يعني، كان غيرك اشطر كرم: غيري؟، انت مجنون؟، انت مش عارف انا مين ولا ايه جمال: انا عارف، لكن هي متعرفش رد عليه وهو بيبصلها بطريقه خبيثه وهو بيجيبها من فوق لتحت كرم: وماله، تعرف.. كانت قاعده بتذاكر ومندمجه جدا لحد مالمحاضره تبدأ كرم كان واقف هو واحمد وسط شلة شباب معروفه بالفساد والانحطاط الاخلاقي رد عليه صاحبه محمود: كرم، متحاولش كرم: ولو وقعت؟ احمد: بلاش الغرور دا، هيبقى شكلك وحش لو رفضتك كرم: كرم المنياوي ميترفضش، واعتقد انتوا شوفتوا، هل في واحده ف الجامعه كلها قالتلي لا؟ محمود: طب يلا ورينا شطارتك يخفيف سابهم ومشي راحلها كرم: احم احم سمعت صوته رفعت وشها بهدوء وببرود استناها ترد بس فضلت بصاله مستنياه يتكلم كرم: انتي مش عارفاني ولا ايه! بيان: لا، مين حضرتك؟ كرم: ااه، "مد ايديه عشان يسلم عليها" كرم المنياوي ، ابن صاحب الجامعه اللي حضرتك قاعده فيها دي بيان بصتله بنفس البرود من فوق لتحت بتتفرج ع شكله وعلى السلسله الدهب اللي لابسها في رقبته والوشم اللي في دراعه ورقبته، وبنطلونه المقطع اللي مسقطه مديتوش اي اهتمام ولا حتى سلمت عليه ورجعت مسكت القلم تاني بص ع صحابه لقاهم قاعدين يضحكوا عليه ودا غاظه جدا كمل وهو بيقعد قدامها ع الكرسي كرم: بيان، اسمك بيان صح بيان بنبره حاده: انت مين سمحلك تقعد؟ كرم: نعم بيان : قوم من مكانك، مين سمحلك تقعد معايا! قامت وقفت وهو وقف قدامها كرم: اسمعي بس، بلاش الشويتين دول، قابلت من نوعك كتير كانوا عاملين فيها كاريزما وولاد ناس ومحترمين، بس الحقيقه، مفيش بنت محترمه، وعشان كدا انا هاجي معاكي دوغري عشان معنديش وقت اضيعه، شايفه البنات اللي قدامك دول كلهم!، محدش فيهم قالي لا، كلهم رهن اشاره واحده مني بيان: امم، ومين قالك اني عايزه اعرف انجازاتك العظيمه دي كرم: لا عايزه، بلاش الشغل دا، هعرض عليكي عرض كويس، عرض مفيش بنت ترفضه احمد: شكله عملها ولا ايه محمود: عملها ايه يعم، انت مش شايف هي بصاله ازاي، دي ناقص ترجع ف وشه معتصم: ااه، بس استنى يمكن يعرف ميل عليها شويه ووطى صوته كرم: عندي حفله صغيره كدا ف الڤيلا عندي، صحابنا هيكونوا موجودين، ولو مش عايزه حد مفيش مشكله، ممكن اكنسلهم وتيجي لوحدك، ومتقلقيش، هتنبسطي ع الاخر، ولو انبساطك دا مش كفايه فانا هقدّر العيون الحلوه دي، وهديكي اللي انتي عايزاه، امسكي، دي ورقه فيها العنوان، هستناكي يحلوه احمد: اوعى خدت منه الورقه، شكلها غمزت فعلا محمود: امال عملالنا فيها ليه ست الحسن والجمال الشريفه، ماهي جت ف خمس دقايق اهي بيان مسكت الورقه بصت فيها ورجعت بصتله بيان: ااه، انت من بتوع مامي وبابي، واهلك مسافرين والبيت فاضي كرم: اي دا عرفتي منين، بس اتطمنى يعني، هتاخدي اللي انتي عايزاه ولو مش عايزاني اقول لحد معنديش مشكله بيان: امم، معندكش مشكله حطت الورقه ع جنب ورزعته كف ثلاثي الابعاد ع وشه صوت القلم فرقع والكل بص عليهم احمد: يادين امي محمود: شكلها غمزت غمزت يعني جمال: شوفتوا، قولتلكوا بلاش دي بيان بصريخ: بيت مين يحيو*ان يو*سخ، انت فاكر نفسك مين يابتاع انت كرم بعصبيه: انتي بتضربيني انا؟، انتي مش عارفه انا مين! بيان: عرفت، عيل لسه بابي ومامي بيصرفوا عليه، دانت حتى لسه مبقتش راجل، اسمع يلا، انت تبعد عني احسنلك، والا والله العظيم هخلي اللي مايشتري يتفرج عليك لسه ماشيه راح مسك دراعها كرم: رايحه فين تعالي هنا انت... لسه مكملش ولقى كف ع خده التاني بيان: ابعد ايدك يحيو*ان، انسان نج*س سابته ومشت برا الجامعه وهو بص لقى الكل بيبصوا عليه واغلبهم بيضحكوا الدم غلي ف عروقه واتغاظ من جرأتها معاه طلع وراها بسرعه وصحابه طلعوا وراه كرم: تعالي هنا بقولك، ايه، فاكره ايه، هتمدي ايدك عليا واسيبك تمشي كدا عادي؟، دانتي ليلة ابوكي سودا بيان: ابعد عني، سيبني بقولك انت مبتفهمش! كرم: اقولك، مش هردلك القلم، انا هعمل حاجه اجمد قرب منها بالعافيه وهما ع الطريق وحاول يبوسها قدام الكل وكل الناس بتتفرج ومصدومين بيان: بتعمل ايه يحيو*ااان ابعد عني زقته بكل قوتها بعيد عنها وطلعت تجري عدت الطريق بسرعه وهو طلع يجري وراها وهو مش شايف قدامه غير كرامته اللي اتبعترت ف الارض دي، طلع مطو*اه من جيبه ومشي عليها كل طلاب الجامعه كانوا برا بيتفرجوا عليهم وكلهم برّقوا لما لقوه طلع المطو*اه وساد التوتر والخوف بين الكل وف اللحظه اللي بيعدي فيها الطريق وقبل مايوصلها بيبص الناحيه التانيه لقى عربيه جايه باقصى سرعتها قدامه بيان: حاااااسب سادت لحظة صمت بين الكل وفجأه ابتدوا يصرخوا لما لقوه واقع ع الارض والدم بينزل منه بكميه كبيره بيان حطت ايديها ع بوقها وفضلت واقفه مكانها بتبص عليه وهو مرمي ع الارض، كل الناس جرت عليه وخدوه المستشفى وصحابه راحوا معاه مامته بانهيار: مين عمل فيه كداا، ابني ايه اللي جراله احمد: اهدي يطنط لو سمحتي، صدقيني هيبقى كويس، الدكتور دلوقتي هيطمنا عليه باباه: انا عايز اعرف دا حصل ازاي محمود: بصراحه يعمو، اصل يعني باباه: اصل ايه وزفت ايه ماتنطق محمود: العربيه خبطته لما كان.. احمد رد بسرعه عشان يقاطعه احمد: في بنت مدت ايديها عليه ف الجامعه، ضربته بدل القلم اتنين، وهزقته قدام الكل مامته: نعم؟!، مين الحيوانه دي، ازاي تتجرأ تعمل كدا مع ابني انا باباه: اهدي بس خلينا نفهم، يعني هي عملت كدا ليه، عملها ايه؟ احمد بتوتر: يعمو بصراحه باباه بحده: قول ياحمد عمل ايه، انا عارف اخلاق ابني كويس، اكيد ضايقها ف حاجه احمد: لا لا خالص، دي هي اللي بتترمى عليه طول الوقت، طبعا حضرتك عارف كرم شاب كويس وغني ووسيم، يعني، البنات كلها بتجري وراه باباه: بنات ايه وزفت ايه، لو هي بتترمى عليه، ليه هتضربه بالقلم! احمد: ماهوو، ماهو هو رد عليها وقالها انه مش عايزها وقالها تبعد عنه والا هيفضحها ف كل الجامعه، بس هي بتتبلى عليه صدقني، هو معملش حاجه قبل ابوه مايرد طلعت الممرضه بتجري مامته بخوف: في ايه، ابني جراله ايه الممرضه: محتاج نقل دم بسرعه ـــــــــــــــــــــــــــــــــــــــــــــــــــــــــــــــ ـ ياحول الله يارب، ربنا يصبر اهله ـ في ايه بابا بيان: المنياوي، ابنه عمل حادثه جامده وكاتبين ان حالته حرجه ف المستشفى مامتها: ياحول الله يارب، ربنا يشفيه، اهو كله من عمايل ابوه باباها: بس ملناش دعوه مامتها: مش المنياوي دا اللي طردك من الشغل ورماك ف الشارع بعد مابقيت عاجز بسبب اهمالهم؟، مش هو السبب في اللي انت فيه دا؟ باباها: يووه، وبعدين معاكي، هو انا ناقص مامتها: مقصدش حاجه والله، بس عشان تعرف ان ربنا مش بيسيب حق حد باباها: رني على بيان كدا خلينا نتطمن عليها، هي معاه ف نفس الجامعه مامتها: ايوا صح استنى مسكت الفون ورنت عليها بيان شافت الرقم وقلبها اتخلع بيان: ايوا يماما مامتها: اي ياحبيبتي عامله ايه بيان: احم، الحمدلله كويسه، بابا كويس؟ مامتها: ااه الحمدلله، المهم كنت عايزه اسألك ع حاجه بيان بتوتر: نعم مامتها: ابن المنياوي، معاكي في الجامعه صح؟ بيان بخوف: هاا، ااه معايا مامتها: مالك في ايه بيان: لا مفيش، بس بتسالي ليه مامتها: عشان منزلين الخبر وقولنا نتطمن منك، كنتي موجوده ساعة الحادثه؟ بيان: همم، لا، لا يماما مكنتش موجوده مامتها: الحمدلله يابنتي، خلي بالك من نفسك بيان: حاضر يماما، سلميلي ع بابا، المهم هقفل دلوقتي عشان عندي شغل قفلت معاها وخدت نفس بخوف فتحت موبايلها عشان تشوف هما كاتبين ايه بيان: الحمدلله مذكرونيش ــــــــــــــــــــــــــــــــــــــــــــــــــــ المنياوي: اسمع منك ليه، هتقولوا نفس الكلام دا للصحفيين اللي بره، هتقولوا كل حاجه البنت دي عملتها، ولو اني عارف كويس انه اكيد هو عملها حاجه، بس اياكوا، اياكوا حد يقول عنه حاجه وحشه، هتقولوا ان البنت دي هي السبب احمد: حاضر اكيد يعني، يلا يمحمود نتكلم مع الصحافه اللي برا خرج هو ومحمود براا ولقوا الصحفيين بيجروا عليهم احمد: هنجاوب على كل اسالتكوا ـ تفتكر الحادثه دي مقصوده؟، ولا صدفه محمود: والله الحادثه كانت صدفه، ولكن كان في سبب اكيد لولاه مكنش كل دا حصل ـ وايه هو السبب دا؟ احمد بص لمحمود احمد: بيان ـــــــــــــــــــــــــــــــــــــــــــــــــــــــ الدكتور: الحمدلله عدى مرحلة الخطر، محتاج يرتاح بش شويه وبعدها تقدورا تشوفوه مامته: شوية ايه، انا هشوف ابني دلوقتي الدكتور: لو سمحتي يفندم، انا مقدر جدا اللي حضرتك فيه، ولكن لو سمحتي هو محتاج يرتاح، بالكاد قدرنا نوقف النزيف مامته: نزيف؟، نزيف ايه!، ابني ماااله الدكتور: متقلقوش، الحمدلله قدرنا نعدي مرحلة الخطر وهو دلوقتي تحت الملاحظه، لو سمحتوا سيبوه يرتاح بص لباباه وبعدين اتكلم الدكتور: ينفع حضرتك تيجي معايا شويه المنياوي: خير في ايه الدكتور: لا مفيش حاجه بس محتاج اتكلم معاك على جنب شويه ـــــــــــــــــــــــــــــــــــــــــــــــــــــــــــــــ ـ الحقي ـ ايه ـ شوفي كاتبين ايه ـ ايه يابنتي في ايه ـ كاتبين ان بيان هي سبب الحادثه اللي حصلت ـ يانهار ابيض، بس دا حرام، هي معملتش حاجه ـ امال عايزاهم يقولوا ايه، دول ناس مفتريه، اكيد مش هيشوهوا صورة ابنهم المبجل قدام الناس ـ يقوموا يلبسوها مصيبه؟ ـ محدش هيقدر يتكلم ولا يكدبهم، وكل اللي شافوا الحادثه هيسكتوا ومحدش هيتجرأ يقف قدام ناس زي دي ـــــــــــــــــــــــــــــــــــــــــــــــــــــــــــــــ بيان خلصت شغل وراحت مطعم جابت منه اكل ومشت دخلت بيت قديم بيان: انا جيت، عمو عثمان عثمان: اتفضلي ينور عمو عثمان شيخ مسن عنده تقريبا 80 سنه، مش بيشوف ولكن تبص ف وشه تلاقي نور ساطع كإنه مش انسان زينا" بيان: يعمو مليون مره اقولك اسمي بيان عثمان: انا بحب اقولك نور بيان: طب بتحب تقولي نور ليه بقاا عثمان: عشان دا كان اسم البنت اللي حبيتها من 50 سنه بيان: هو حضرتك عمرك قد ايه عثمان: يمكن 80 ولا حاجه، انا عارف بقاا بيان: ربنا يحفظك يعمو، بس قولي ليه متجوزتهاش طلاما حبيتها كدا عثمان بحزن: النصيب، نصيبك هيصيبك مهما حاولت بيان: طب ومراتك اللي اتجوزتها وخلفت منها، محبتهاش خالص؟ عثمان: حبيتها، بس هي محبتنيش، رمتني هي وعيالها ف الشارع وانا عندي 80 سنه ومبشوفش، يمكن استكتروا عليا اللقمه بيان: عندك كام عيل يعمو عثمان: عندي ٧ رجاله و٣ بنات بيان: اللهم بارك، معقول محدش فيهم بيجيلك خالص! عثمان: ولا بيعبروني يبنتي، انا بس، كان كل همي اتطمن عليهم، اشوفهم خلفوا ولا لا، كان نفسي اشوف احفادي والاعبهم بيان: معلش، ادعيلهم ربنا يهديهم ويحنن قلبهم عثمان: مش زعلان، انا بس صعبان عليا عمري اللي ضيعته عليهم، ١٠ اولاد ربيتهم واديتهم كل اللي حيلتي، تصدقي اني كنت بنام من غير عشا عشان اوفر اللقمه بتاعتي ليهم!، قعدت يمكن ٢٠ سنه مجبش لنفسي هِدمه جديده، قولت انا عشت حياتي، اوفرلهم كل قرش عشان ميبقوش اقل من حد، عمري ماضربت حد فيهم قلم ولا قولت كلمه تجرحهم، بس انتي عارفه في المقابل كانوا بيعملوا ايه؟ بيان بتأثُر: ايه يعمو عثمان: عمر ماحد فيهم قالي سلامتك يبابا لما كنت بتعب، ولا حد نده عليا عشان اكل معاهم، مسمعتش كلمه حلوه منهم، ولما كبرت ومبقتش قادر اسند نفسي، بقيت تقيل عليهم، خاصة اني بقيت خلاص مش نافع ف حاجه ولا بعرف اجيب فلوس زي الاول، ولما ربنا ابتلاني وفقدت بصري، بقيت تقيل اكتر، مش عارف انا عملتلهم ايه عشان يكرهوني كدا، شوفي، شوفي يابنتي العلامات دي، دي اثار ضربهم ليا، كانوا بيضربوني ويفرغوا غلهم وغضبهم فيها، بس انا مش زعلان، ربنا يسامحهم ويهديهم بيان: بس يعمو خلاص بالله عليك، هما الخسرانين اصلا، صدقني هيعرفوا قيمتك كويس وهيندموا عليك وع اللي عملوه دا، يلا بقاا امسح دموعك وتعالى انا جبتلك اكل، فاكر المره اللي فاتت لما قولتلي ان الفراخ عجبتك عشان كانت مستويه كويس وطعمها حلو!، جبتلك منها تاني اهوو، يلا افتح بوقك عشان هأكلك بنفسي الشيخ عثمان ابتسم ع طيبتها: كتر خيرك يابنتي، متعرفيش غلاوتك عندي قد ايه بيان: لا عارفه طبعا، دانا مفيش مني اتنين، دانا لو كنت قابلتك زمان كنت جريت ورايا عشان تتجوزني عثمان بضحك: يااه، للدرجادي! بيان: طبعا، عندك شك ولا ايه عثمان: لا طبعا معنديش، بس قوليلي، ايه اللي مزعلك بيان: مفيش حاجه عثمان: عارفه بقالك قد ايه بتيجي تزوريني هنا؟، شبه حفظتك، قوليلي يلا ايه اللي مزعلك بيان اتنهدت وابتدت تحكيله ـــــــــــــــــــــــــــــــــــــــــــــــــــــــــــــــ مامته: اتصرف، البنت دي لازم تتحاسب، لازم تبقى عبره لكل اللي زيها المنياوي: اهدي شويه، دلوقتي احنا قدمنا بلاغ ضدها وكمان صحاب كرم كلهم شهدوا عليها، والاخبار كلها بتتكلم في الموضوع، ينفع تهدي بقى مامته: اهدى ازاي، انا لو شوفتها هاكلها باسناني، ازاي المنحطه دي تتجرأ وتلمس ابني، دي ضربته، انت متخيل ان عيله جربوعه زي دي تعمل ف ابني انا كدا؟، دانا مش هخليها تشوف نور الشمس تاني، بنت مين هي عشان تعمل كدا؟ احمد جه احمد: يعمو انا عملت كل اللي قولتلي عليه، مفيش حد هيتجرأ يقول كلمه واحده، كلهم خافوا، وكمان حفظتهم هيقولوا ايه، وكمان مسحت كل حاجه في كاميرات المراقبه اللي كانت في المكان، يعني اتطمن مامته: والجربوعه دي فين، ممسكتوهاش ليه؟ المنياوي: عرفت معلومات عنها؟ احمد: طبعا، هي مش من هنا، بس قاعده في سكن الطالبات عشان بلدها بعيده، ودا عنوانها، وانا اديت المعلومات دي للشرطه ــــــــــــــــــــــــــــــــــــــــــــــــــــــــــــــ الشيخ عثمان: لا حول ولاقوة الابالله، هي الدنيا جرى فيها ايه بيان: والله دا يعمو اللي حصل بالظبط عثمان: مصدقك يابنتي من غير حلفان، دانتي الشارع كله بيحلف بيكي وباخلاقك ع الرغم انك مش من هنا، بس متقلقيش، ربنا بينصر المظلوم دايما، متقلقيش طول مانتي ع حق، صاحب الحق ينام مرتاح لان محاميه ربنا مش اي حد بيان: ونعم بالله، ع الرغم من انه قهرني من اللي عمله معايا، الا اني اتضايقت عليه وبدعي انه يقوم بالسلامه عثمان: عشان انتي جميله وقلبك جميل بيان: طب يعمو انا مضطره امشي دلوقتي عشان عندي مذاكره كتير، باقي الاكل اهو جنبك، لو جوعت انا مفصصالك كل حاجه عشان تاكل ع طول من غير ماحاجه تغلبك، والمصليه اهي جنبك هي والمصحف وكمان ياسيدي المايه اهي، تؤمرني بحاجه تانيه يقمر انت؟ الشيخ عثمان: ربنا يحفظك يابنتي وينورلك طريقك ويعينك على الدنيا بيان: يلا يقمر اشوفك بكرا الشيخ عثمان: استني، هقولك حاجه اخيره، ايا كان اللي هيحصل، متخافيش، خليكي قويه، متخليش حاجه تهزك ابدا طول مانتي مش غلطانه، اقفي قدام الدنيا وواجهيها بشجاعه عشان ربنا ف ضهرك بيان حست باحساس غريب وان مستنيها حاجه كبيره شكرته ومشت بسرعه رجعت السكن بيان طالبه ف الكليه وواخده سكن عشان اهلها ف بلد والكليه ف بلد دخلت اتوضت وصلت ودخلت تعمل لنفسها اكل، لقت البنات اللي معاها ف السكن بيبصولها بطريقه غريبه، فخمنت ان اكيد عشان اللي حصل ف الجامعه بيان: هند، في ايه هند: بيان، ليه عملتي كدا بيان: عملت ايه هند: انتي مش عارفه مين الناس دي، ولا عارفه هما قادرين يعملوا ايه، دا ابنهم الصغير والدلوعه، متخيله لو جراله حاجه هيحصل فيكي ايه؟ بيان: وانا مالي، كل اللي كانوا واقفين شافوا اللي حصل، انا ذنبي ايه هند: معندكيش فكره ورطتي نفسك ف ايه، بس اللي اقدر اعمله اني ادعيلك انها تعدي على خير جت نهى نهى: ايه دا، الهانم شرفت!، اهلا يبيضه، بقاا يمنيله دي عمله تعمليها؟، طب ياستي اتقلي شويه ماشي، لكن مش لدرجة انك تضربيه بالقلم، وكمان يعمل حادثه بسببك بيان: اخرسي انا معملتش حاجه نهى: معملتيش دا ايه، دانتي عملتي كتير قوي، لما انتي روحتيله الشقه قبل كدا، امال ايه لازمة النمره اللي عملتيها دي! بيان: شقة ايه يامنحطه انتي نهى: ايه دا، انتي هتتشطري عليا انا؟، الحق عليا خوفت عليكي، قال عملالنا فيها الشريفه العفيفه، وتعالي ي بيان نخرج، لا الوقت اتأخر، تعالي يبيان نقابل، لا عيب وحرام، تعالي ي بيان نتنيل، لا يانهى ملكيش دعوه بيا، على ايه ياختي كل دا، صحيح، تحت السواهي دواهي كانت بتكلمها وهي بترفعلها حواجبها وتتريق عليها بيان: انتي انسانه قذ*ره، وفاكره كل الناس زيك وزي تربيتك، انا اشرف من عيلتك كلها، وميهمنيش انتي تشوفيني ازاي، يهمني ربنا شايفني ازاي، دا بس اللي يهمني، انما اقول ايه، انتي اخر مره فتحتي فيها مصحف امتى اصلا، اخر مره ركعتي لله كانت امتى!، هستنى منك ايه نهى: سبتلك انتي الصلاه ياست الشيخه، ابقي خدي الجنه لوحدك، هيهي او السجن يعني ايهما اقرب هند: سجن ايه نهى: هو ايه اللي سجن ايه، افرضي الواد جراله حاجه، دول كاتبين انه بين الحياه والموت، اياك هييجوا يكافئوها، دانتي مستنيكي ايام اسود من شعر راسك يروحي بيان بصتلها بقرف وسابتها ودخلت تعمل اكل ملقتش اكل غير جبنه بيضه، لسه بتحط ف بوقها اول لقمه راح الباب خبط جامد قامت عشان تفتح الباب ولما فتحت بلعت ريقها بصعوبه لما لقت.... ــــــــــــــــــــــــــــ♕♡ فتحت الباب واتصدمت لما لقت.. ـ انتي بيان محمد عبد الرحمن؟ بيان: ايوا يفندم، في ايه ـ مطلوب القبض عليكي ــــــــــــــــــــــــــــــــــــــــــــــــــــــــــ مامتها: منمتش ليه باباها: مش عارف، قلبي مقبوض، حاسس ان في حاجه غلط مامتها: حاجة ايه يامحمد، ماكل حاجه زي الفل اهي الحمدلله، ايه اللي حصل بس باباها: بيان، رني عليها كدا، خليني اتطمن عليها احسن مامتها: ماحنا رنينا عليها النهارده وكلمناها، وهي كويسه الحمدلله مفيش حاجه، ليه القلق دا بس باباها: معلش، طاوعيني وافتحي، افتحي الزفت دا ورني على بنتي مامتها: حاضر خدت الفون واول مافتحته شافت كذا رساله، طنشت ورنت على بيان بس موبايلها مقفول مامتها: مقفول، اكيد نامت باباها: ولو نامت هتقفله ليه بس مامتها: لا اله الا الله، يمكن مش عايزه حد يزعجها ولا حاجه، بتتعب من الشغل والجامعه ياحبة عيني وترجع تنام على طول باباها: طيب، بس حاولي معاها تاني مامتها: حاضر، نام انت بس وارتاح عشان متتعبش، ولما ترد هخليها تكلمك، يلا تصبح على خير ـــــــــــــــــــــــــــــــــــــــــــــــــــــ بيان: انا عايزه اعرف انا هنا ليه ـ هتعرفي دلوقتي دخل المنياوي المنياوي: انتي بيان بيان: ااه، ممكن تفهمني انا بعمل ايه هنا المنياوي: الله، انتي ناسيه ولا ايه، اعتقد دي حاجه متتنسيش يعني، بسببك ابني كان هيروح مني بيان: وانا مالي، ابن حضرتك مهزق ومترباش، وسبحان الله كان عايز يإذيني، بس ربنا ردله اذاه من قبل مايلحق يعمل حاجه ـ كان عايز يإذيكي ازاي ي انسه بيان؟ بيان: حاول يعتدي عليا المنياوي: اخرسي، انتي عارفه انتي بتتكلمي على مين!، عارفه مين هو كرم المنياوي؟ بيان: ميشرفنيش اني اعرف، روح ربي ابنك الاول المنياوي: ابني مرمي ف المستشفى بسببك، مامته منهاره عليه ـ الاستاذ بيتهمك ان انتي اللي زقيتي ابنه قدام العربيه، الكلام دا صحيح؟ بيان بصدمه: نعم!، لا طبعا، دا كدب ـ طيب، تقدري تقوليلنا الحادثه حصلت ازاي! بيان والدموع في عينيها: حاول يتعرف عليا، وانا رفضته، حاول يتعرف عليا بالقوه وبقلة ادبه وبرضو رفضته، ولما قل ادبه جامد وقالي حاجات عيب انها تطلع لواحده بنت روحت ضربته بالقلم، ولما مسكني ضربته قلم كمان، ومشيت من الجامعه كلها، طلع يجري ورايا وحاول يعتد*ي عليا قدام الناس كلها وف الشارع، زقيته وجريت، راح مطلع مطو*اه وجري عليا بيها، وقبل مايلحق يعدي الطريق العربيه خبط*ته، انا ذنبي ايه دلوقتي؟ المنياوي حط رجل ع رجل وولع سيجاره وهو ساند ضهره ل ورا المنياوي: انا شوفت كتير وقليل، بس مشوفتش حد بيعرف يمثل او يتقن الدور زيك، براڤو، لا حقيقي براڤو، انتي عارفه ياهانم اللي انتي بتتهميه دا يبقى مين، طيب متخيله كمية البنات اللي حواليه، وكلهم من عيله وحسب ونسب، تفتكري هيبصلك انتي ليه؟ بيان: مستغربتش بصراحه، واحد زيك اكيد دا هو اللي هيهمه، بدل ماتروح تربي ابنك وتعلمه الاخلاق والادب، فرحان قوي بلمة البنات حواليه؟، طبيعي يطلع كدا، اكيد مش هيطلع امام مسجد يعني المنياوي: اثبت تطاولها وقلة ادبها دي ف المحضر لو سمحت، وانا هكتفي بكدا، وهسيب الباقي لحضراتكوا، يعني انا واثق من عدالة الحكومه بتاعتنا، واكيد مش هتسيبوا واحده زي دي تشوه صورة ابني ـ اتفضل يفندم الظابط وصله وقفل الباب ورجع ل بيان ـ هاا، مش عايزه تقوليلي زقيتيه ليه؟ بيان: نعم! مانا قولت لحضرتك اللي حصل ـ وايه اللي يخليني اصدقك بيان: انا مش عايزاك تصدقني، انا عايزاك تثبت برائتي، مش دا شغلك؟ ـ ااه شغلي، بس تقولي ايه بقاا في كل الشهود اللي قالوا انهم شافوكي وانتي بتزقيه، وكمان شافوكي وانتي واقفه بتتكلمي معاه واخدتي منه ورقه كمان، ولما شافوا الورقه لقوها مكتوب فيها عنوان ورقم تليفون بيان: مين اللي شهد بالكلام دا؟، دا كله كدب، محصلش ـ هيتبلوا عليكي ليه؟، ايه هدفهم من انهم يتهموكي اتهام زي دا، ومش بس كدا، كمان شهدوا انهم شافوني عنده ف البيت قبل كدا بيان بصدمه: اخرس، انت بتقول ايه، انا اشرف منكوا كلكوا ـ ماتحترمي نفسك، انتي شايفك انتي فين و بتتكلمي مع مين؟ بيان: ماهو دا مش عدل، اكون ضحيه ومظلومه وفجأه اشيل انا الليله كلها، دا ميرضيش حد ـ كل الشهود ضدك، مفيش حد وقف ف صفك بيان: اكيد اشتراهم، المنياوي بيه يقدر يعمل اي حاجه صح ولا ايه، طيب اكيد في كاميرات مراقبة، شوفوها وهتتأكد من صحة كلامي ـ الكاميرات كلها مش شغاله، شوفي ازاي بقاا، على حظك الكاميرات كلها تعطل بيان: ودي صدفه برضو! ـ قصدك ايه بيان: هما اللي عملوا كدا، انا معملتش حاجه ولو سمحت انا محتاجه امشي عشان اهلي اكي... ـ تمشي فين، انتي هتشرفينا هنا لحد مانشوف دنيتك ايه بيان: نعم؟؟؟، يعني ايه؟، هتسجن؟ ـ الله ينور عليكي، دي محاولة قتل متعمد لحد من اهم الناس في البلد، يعني ممكن تكون الحكايه مطبوخه، يعني مش لعب عيال ـــــــــــــــــــــــــــــــــــــــــــــــــــــــــــــــ تاني يوم جمال: بس دا حرام يابني احمد: هو ايه اللي حرام ياخويا جمال: تلبسوا البت مصيبه وهي معملتش حاجه احمد: طب روح ياجامد ياشريف انت اشهد معاها، محدش ماسكك جمال سكت وبصله بقرف احمد: ايوا كدا، شوف مصلحتك فين وبلاش تضيع نفسك، انت عارف لو قولنا الحقيقه هيحصل ايه؟، وكمان المنياوي بيه مترشح للانتخابات دلوقتي، يعني لازم يبقى صفحته بيضه، وعمله زي اللي عملها ابنه دي كفيله تخليه يخسر وتشوف سمعته لما يعرفوا ان ابنه حاول يعتدي على واحده جمال: ربنا مش هيعدي حاجه زي كدا من غير حساب، منكوا لله ـــــــــــــــــــــــــــــــــــــــــــــــــــــــــــــــ في التليفون مامتها: ايه يابني في ايه، بترن ليه دلوقتي امجد: يعمتي انتوا فين من الصبح، عمال ارن عليكوا محدش بيرد مامتها: مالك يابني بس اهدى، خير حصل ايه امجد: اهدى ايه وزفت ايه، الاستاذه بنتك بايته ف القسم من امبارح مامتها: يالهوي؟، انت بتقول ايه امجد: متهمه بمحاولة قتل ابن المنياوي، واتقبض عليها ولسه عارف الموضوع دا دلوقتي، جوزك فين مامتها: نزل الجامع يصلي، امجد انت بتقول ايه، محمد لو عرف حاجه زي كدا هيروح فيها، دا مريض امجد: يعمتي بقولك في القسم من امبارح، انتي بتقولي ايه، انا هرن عليه اقوله عشان نروحلها مامتها: يابني والله هيروح فيها، استهدى بالله بس وفهمني، بيان متعملش كدا، انا سألتها قالتلي انها مكانتش موجوده اصلا، ليه بتقول كدا يابني متوقفش قلبي حرام عليك امجد: طب افتحي التليفون كدا وشوفي كاتبين ايه ع النت، دي اخرتها، انا قولتلكوا بلاش تسفروها لوحدها، اهي فضحتنا ـــــــــــــــــــــــــــــــــــــــــــــــــــــــــــــــ ـ عمي محمد، طمني ايه اللي حصل محمد بابا بيان بعدم فهم: اطمنك على ايه ـ تطمني على ايه ازاي، اللي حصل امبارح محمد: وايه يابني اللي حصل امبارح ـ الله، انت متعرفش ولا ايه، حادثة ابن المنياوي اللي كنت شغال عنده دا محمد: ااه قصدك على دا، والله يبني معرفش، انا شوفت الخبر امبارح ودعيتله ربنا يقومه بالسلامه ويهديه ـ اي دا في ايه، انا مش فاهم حاجه محمد: انا اللي مش فاهم انت عايز ايه ـ حضرتك بتدعيله ازاي وهو متهم بنتك محمد بعدم فهم: متهم بنتي مين ـ ياحول الله يارب، بنتك بيان ياعم محمد محمد: انت بتقول ايه يابني انت، يتهمها ازاي، هي مالها ـ بيقولوا انها هي اللي زقته قدام العربيه لما قالها انه هيفضحها عشان كانت بتحاول تقربله، وكمان سمعت انها راحتله الشقه قبل كدا قاطعه عم محمد بقل*م على وشه محمد: اخرس يحيوان، شقة ايه يقليل الادب، دي بنتي، ست الناس كلهم ـ انت بتمد ايدك عليا يراجل يعايب؟، دا بدل ماتروح تشوف بنتك اللي مدوراها في كل حته!، طبعا مانتوا عايشين هنا ف العسل وسايبينها دايره على حل شعرها، عاملين فيها بس محدش زيكوا ف الادب والاخلاق، بنتك بايته ف التخشيبه من امبارح، لا متقوليش انك كمان متعرفش دا، جاي تتشطر عليا انا؟ الناس كانت اتلمت على الصوت وعم محمد فضل يكح كتير وهو ماسك قلبه ومعاه العكاز بتاعه، لحد ماوقع ع الارض والناس خدوه المستشفى ــــــــــــــــــــــــــــــــــــــــــــــــــــــــــــ مامته: حمدلله على سلامتك ياحبيبي كرم: ااه، ااه دماغي، انا فين مامته: انت في المستشفي ياحبيبي، بس متقلقش، وديني ل ارجعلك حقك من الجربوعه دي كرم: ااه، انا مش فاكر غير ان العربيه كانت جايه عليا المنياوي: عملت حادثه ونقلوك هنا، متقلقش، البنت اتسجنت، المهم اياك تنطق وتقول ان حضرتك اللي حاولت تعتد*ي عليها كرم بتوتر: احم اعتدي على مين انا.. المنياوي: انا عارف كل حاجه، وعارف انك تستاهل اكتر من كدا، بس اعمل ايه، داخل على انتخابات ومضطر ادافع عنك، هتقول ان هي اللي زقتك قدام العربيه، انت فاهم؟ مامته: انت ليه مصدقها قوي كدا، اكيد بتكدب، ابني معملش حاجه المنياوي: لا عمل، والبت دي هي الوحيده اللي قدرت تهزقه وتهين كرامته، اياك انتي مش عارفه اخلاق بنتك مامته: حتى لو دا صح، مش من حقها انها تمد ايديها على ابني، هي تطول اصلا؟ ـ هي مين دي بصوا كلهم ناحية الباب مامته: عُمر، حبيبي وحشتني حضنته وسلموا ع بعض عمر: انا مش فاهم حاجه، ايه اللي حصل كرم: شوفت عملت فيا ايه عمر: هي مين دي المنياوي: استنى بس، انت ايه اللي رجعك؟ عمر: المفروض اني اعرف ان اخويا ف المستشفى ومجيش يعني ولا ايه المنياوي: لا، بس مقولتش لحد يعني انك جاي عمر: كلمت ماما وقولتلها اني هرجع وبعد كدا ابقى اسافر تاني، المهم انا عايز افهم ايه اللي مكتوب ف الاخبار دا، مين البنت دي، وليه عملت كدا مامته: بت جربوعه من الشارع، دايره ورا ابني ف كل حته، عرضت عليه نفسها، وراحتله الشقه كمان، وغالبا هو زهق منها وقالها كفايه بقى، بس تقول ايه ف الطمع بتاع الاشكال دي، حتى بجاحتها وصلت انها تعمل كدا ف الجامعه وتلزق فيه، زقته قدام العربيه يعمر، شوفت الجربوعه دي عملت ف ابني ايه، شوفت اخوك حالته عامله ازاي كرم: بس على مين، والله ماهسيبها، هعرفها ازاي تضربني بالقلم كدا عمر: بالقلم كمان؟ مامته: شوفت، لما اشوفها بس، دانا هشرب من دمها بس الصبر عمر: ثواني بس عشان حاسس ان في حاجه غلط، هتضربك بالقلم ازاي وهي اصلا اللي لازقه فيك! كرم: هاا، يعني ايه عمر: يعني واحده دايره وراك ف كل حته، وغالبا يعني انت عاجبها، هتضربك بالقلم ليه؟، بتلفت انتباهك مثلا؟ المنياوي بتوتر: لا، لا يبني، هو قالها انه هيفضحها وهيقول انها راحتله الشقه، وهي كانت عايزه تلحق نفسها ب اي طريقه، راحت ضربته بالقلم وقالت ان هو اللي داير وراها، بس الحمدلله محدش صدقها، كله شهد مع كرم اصلا والجامعه كلها شافت اللي حصل عمر: ااه، طب الف سلامه عليك، ولو ان يعني الموضوع مش راكب ف دماغي لاني عارف انك مترفضش اي بنت اساسا، بس اكيد كله هيبان في التحقيق المنياوي: طبعا يبني، دا ابن المنياوي، الاخبار كلها بتتكلم ف الموضوع الدكتور دخل الدكتور: ممكن تتفضلوا عشان اتطمن عليه وعشان يرتاح شويه، لو سمحتوا ـــــــــــــــــــــــــــــــــــــــــــــــــــــــــــــــ امجد: شايفه بنتك وصلتنا ل ايه؟، شايفه اخرتها؟ مامتها بعياط: يبني بس بقاا، حرام عليك انا ناقصه امجد: دا غير الفضيحه اللي ف البلد، البلد كلها بكبيرها بصغيرها عرفوا الفضيحه بتاع بنتك مصطفى جيرانهم: انت شايف ان دا وقته!، استنى لما الراجل يخرج من العمليات وتعدي على خير، بعدها كل حاجه تتحل امجد: ايه اللي هيتحل، دي في السجن ياعم مصطفى مامتها: روحلها يا امجد، روحلها بالله عليك، تلاقيها خايفه دلوقتي، روح وافهم منها ايه اللي حصل، انا هستنى لما محمد يخرج بالسلامه وهاجي وراك، روح يبني الله يسترك امجد: هروح طبعا، لما نشوف الست هانم هتودينا على فين تاني امجد خد ابوه معاه وراحولها ــــــــــــــــــــــــــــــــــــــــــــــــــــــــــــــ المنياوي: هتيجي معايا دلوقتي يا عمر عمر: اجي فين المنياوي: مش عايز تشوف اللي حاولت تقتل اخوك!، مش عايز تشوفها قبل ماتتعدم! عمر: تتعدم! المنياوي: ااه عمر: ليه المنياوي: ليه ازاي عمر: عملت ايه عشان تتعدم، لو اصلا كلامكوا صحيح، فهي تستحق العقاب، ولكن تتسجن كام سنه يعني، مش لدرجة اعدام مامته: لا ياحبيبي، الكلام دا لو عملت كدا مع حد تاني، انما دا ابني، وبعدين ابوك هيتوسط جامد، ع الاقل لو مخدتش اعدام كفايه انها متشوفش نور الشمس تاني عمر حس ان في حاجه غلط وتوترهم دا وراه حاجه عمر: ماشي، يلا نروح نشوفها، وبالمره اسمع منها يمكن عندها كلام تاني المنياوي: كلام ايه، ماهي اكيد هتكدب، اقولك خلاص مش لازم نروح، يلا نروح الشغل عشان... عمر: ليه غيرت رأيك!، مانت كنت عايزني اشوفها قبل ماتتعدم المنياوي: افتكرت حاجه في الشغل، نروح الشغل وبعدين نشوف عمر: خلاص، روح الشغل انت وانا هروح اشوفها المنياوي: لا، خلاص متشغلش دماغك بيها مش مهم عمر: ليه مش عايزني اروح؟ المنياوي حس انه كدا بيكشف نفسه اكتر، وعمر لو عرف الحقيقه مش هيسمحله انه يعمل كدا المنياوي: خلاص يعمر، يلا نروح الشغل وبعدها نروح للبنت دي ـــــــــــــــــــــــــــــــــــــــــــــــــــــــــــــــ باباها لسه في العمليات ومامتها منهاره بره من الخوف على الاتنين مصطفى: استهدي بالله ياحجه، صدقيني كل حاجه هتبقى كويسه ان شاء الله مقدرتش ترد عليه واغمى عليها، واخت بيان الصغيره " تقى" عندها ١٠ سنين، قاعده تعيط وهي مش مستوعبه حاجه الخبر اتنشر في البلد كلها وكل الناس مبتتكلمش في حاجه غير في الفضيحه ـــــــــــــــــــــــــــــــــــــــــــــــــــــــــ وصل امجد وابوه عند بيان، بصعوبه عرفوا يدخلولها امجد: بيان بيان: امجد؟ امجد: هي دي اخرتها!، لولا بس اننا في مكان مينفعش فيه اني اعمل كدا، كنت ك*سرت وشك بإيديا دي بيان: ك*سر ايدك، فاكر نفسك مين، ازاي تكلمني كدا ابوه: انتي معووجه على ايه، انتي مش شايفه نفسك فين؟، لسه شايفه نفسك على ايه! بيان: انتوا ايه اللي جابكوا، وبابا فين امجد: ااه، المفروض نسيب حضرتك مسجونه ومنجيش بيان: انا معملتش حاجه، مليش ذنب في حاجه ابوه: امال قبضوا عليكي ليه بيان: عشان ابوه راجل كبير ف البلد، لبسوني انا التهمه امجد: وهيعملوا معاكي انتي كدا ليه، اشمعنى انتي!، سيرتنا بقت ع كل لسان، كل البلد بتتكلم في فضيحتنا، فضحتينا يابيان، هنرفع وشنا ازاي قدام الناس! بيان: معرفش، انا مش فاهمه حاجه ومش مستوعبه حاجه، ولو سمحت اهدى انا مش ناقصاك، كل اللي اعرفه اني معملتش حاجه، ليه محدش مصدقني موبايل امجد رن امجد: ايوا نعم ف نفس اللحظه دي دخل عمر والمنياوي عليهم في المكتب عمر دور بعينيه ببطء على البنت اللي عملت كدا في اخوه، لقاها قاعده ع الكرسي وباصه عليهم، جت عينيهم في عيون بعض لبرهه من الوقت، وكإن الوقت وقف ساعتها عند الاتنين، بس قطع شرودهم صوت امجد امجد بصدمه: بيان، ابوكي تعيشي انتي... ــــــــــــــــــــــــــ امجد بصدمه: بيان، ابوكي تعيشي انتي.. بيان: ايه؟، ابو مين امجد: باباكي، رنوا عليا من المستشفى دلوقتي و.. بيان: مستشفى ايه؟، بابا امتى دخل المستشفى، بابا كان في البيت، انا، انا لسه باعتاله علاجه ع البيت، ك، كنت لسه بكلمه ابو امجد: لا حول ولاقوة الابالله، ربنا يرحمه بيان بصريخ: يرحم مين؟؟؟، ابويا ممتش، انتوا مجانين، كلكوا مجانين، وعايزين تجننوني معاكوا، ابويا عايش ومستنيني ارجع اقوله اني معملتش حاجه، مستني اني اثبت برائتي عشان الدنيا كلها تتأكد اني معملتش حاجه، كمان هتتبلوا على ابويا؟؟؟، حرام عليكوا دا راجل مريض امجد: اهدي لو سمحتي، وبعدين مش فاهم، ماهو دا طبيعي يحصل، كنتي مستنيه ايه يعني بعد الفضيحه دي، لما انتي خايفه عليه كدا، ليه محافظتيش عليه وصونتيه!، هاا، ليه عملتي عمله زي دي، وانتي بتروحي للحيوان دا الشقه ليه مفكرتيش ف ابوكي يا بيان هانم جمعت كل قوتها في كف ايديها وناولته على وشه بيان: اخرس، اخرس خالص، اياك، اياك تتكلم عليا نص كلمه، نص كلمه بس، وقتها صدقني هرتكب فيك جنايه فعلا، انا مروحتش لحد شقق، عايزين تصدقوني صدقوني، مش عايزين اولعوا بجاز، انا عايزه اروح لابوياااا، ابعدوا من وشي كانت خارجه من المكتب بس امجد مسك ايديها وبصلها بغل رفع ايده عشان يضربها بالقلم وهي خبت وشها الناحيه التانيه بس كانت ايد عمر اسرع عمر بجديه: بتعمل ايه امجد: وانت مالك عمر: لا هو مش مالي، بس مفيش بنت تتضرب وانا موجود، زي ماتقول كدا رجولتي متسمحليش بكدا امجد: وانت مالك، دي بنت عمتي، انا عارف المفروض اربيها ازاي عمر: تربيها مره واحده؟، وبعدين مين قالك انها عشان بنت عمتك تمد ايدك عليها، محتاج تاخد درس رجوله امجد: والنجم يبقى مين المنياوي: بس ياعمر، سيبه يعلمها الادب احنا مالنا، كدا كدا حقنا هناخده بالذوق وبالقانون، المشاكل العائليه دي متخصناش الظابط: وقت زيارتكوا انتهى، تقدروا تتفضلوا دلوقتي امجد: انا همشي، هروح ادفن الراجل اللي مات بحسرته بسببك دا، بس هرجعلك امجد مشي هو وابوه وهي واقفه باصه ف الارض ومتنحه من الصدمه، مش مستوعبه ايه اللي حصل الظابط: بيان، انسه بيان مستنيينها ترد عليهم بس فجأه انهارت وفضلت تصوت ـــــــــــــــــــــــــــــــــــــــــــــــــــــــــــــــ تقى بعياط: ماما، ماما انا خايفه، بابا فين مامتها كانت قاعده ف اوضتها على سجادة الصلاه ولابسه اسود وماسكه سبحه ودموعها نازله بس هي ساكته تقى: ماما، ماما ردي عليا، الصويت اللي بره دا مخوفني، ماما ساكته ليه الستات بره بيصوتوا ويندبوا وهي قافله على نفسها هي وبنتها ف الاوضه ومش بترد على حد رجع امجد وابوه وخلصوا كل حاجه وراحوا دفنوه ورجعوا امجد: هنعمل ايه، مينفعش نعمل عزا ٣ ايام والبت دي هناك، لازم نروحلها ولو روحنا مين هيفضل هنا ابوه: روح انت ليها، وانا هفضل هنا اخد العزا قطع حديثهم مامتها لما خرجت من الاوضه وطلعت وقفت قدام الرجاله مامتها: مفيش عزا، العزا هناخده لما نثبت براءة بنتي، ست الناس، اشرف بنت في البلد، لما نثبت براءتها وقتها نقدر ناخد العزا ابو امجد: انتي بتقولي ايه، براءة ايه وزفت ايه ادخلي جوا، انتي مالك بحاجات الرجاله دي امجد: عمتي، ارجوكي كفايه فضايح، مش هتبقى انتي وبنتك، كفايه جبتولنا العار ضربته بالقلم وسط كل الموجودين مامتها: لما الكبار يتكلموا، اللي زيك يخرسوا خالص، اللي مات دا جوزي، وانا قولت مش هناخد عزاه، لما نثبت للي زيك ان بنتي زي الفل واشرف من الشرف، وقتها اخد عزا جوزي وانا مرتاحه، ناخد عزاه ازاي قبل مانريحه في رقدته ــــــــــــــــــــــــــــــــــــــــــــــــــــــــــــ كرم: ماما، انا حاسس ان الموضوع مش هيعدي على خير مامته: ليه ياحبيبي كرم: عمر يماما، انتي عارفه عمر طبعه عامل ازاي، وازاي بيقفلنا ع الواحده، لو اكتشف الحقيقه مش هيتردد انه يفضحنا مامته: مفيش حقيقه غير اللي قولناها، اتطمن انت بس عشان تقوم بالسلامه يقلب ماما كرم: اتطمن ازاي يماما، دا عمر، دا لو عرف اني عملت كدا، يلهوي دا ممكن يموتني، انتي ناسيه الضرب اللي ضربهولي لما، احم، لما اتحر*شت ب البت اياها؟، كنت هموت في ايده مامته: متقلقش يعمري، محدش يقدر يقربلك، انا جنبك يحبيبي، يلا عشان تاكل بقى ـــــــــــــــــــــــــــــــــــــــــــــــــــــــــــــــ بيان: ااه، انا فين عمر: حمدلله ع السلامه بيان: انا فين عمر: زي مانتي شايفه، في المستشفى بيان افتكرت باباها وقامت مخضوضه بيان بخضه: بابا عمر: اهدي لو سمحتي، انتي تعبانه بيان: تعبانة ايه، انا لازم امشي، لازم اشوف ابويا ماله، انتوا حاطين الكلبشات في ايدي ليه هو انا مجرمه، فك البتاع دا عمر: ينفع تهدي، انتي دلوقتي مقبوض عليكي، يعني مش هتعرفي تروحي ف حته بيان: وابويا؟ عمر: اا، يعني انا اتأكدت من الخبر، فعلا والدك توفاه الله، ربنا يرحمه بيان: لو سمحت متقولش كدا، ارجوك، بابا مينفعش يموت، مينفعش يموت وهو شايفني كدا، لازم اثبت براءتي، ارجوك خليني اروحله واقوله اني معملتش حاجه، هو بيثق فيا وهيصدقني، ارجوك، لو سمحت كانت قاعده قدامه ع السرير في المستشفى وعماله تعيط ومنهاره وبتترجاه عمر قعد جنبها عمر: للاسف مش هتعرفي تشوفيه بيان: يعني ايه عمر: والدك اتدفن خلاص، يعني مش هتعرفي تعملي حاجه غير انك تزوريه بيان: يعني مش هشوفه؟، انت، انت بتقول ايه انت، انتوا كلكوا مجانين ابتدت تكسر في الحاجات اللي حواليها بيان: بابا مستنيني في البيت عشان اروحله، مستنيني انجح عشان يرقص معايا في تخرجي، سيبوني اروحله حرام عليكوااا، انتوا متعرفوش ربنااا عمر وهو بيحاول يسيطر عليها: اهدي لو سمحتي، اهدي اللي بتعمليه دا مش هيفيد في حاجه، هتتعبي اكتر الدكتور والممرضات دخلوا وادوها مهدئ وسابوها تنام ـــــــــــــــــــــــــــــــــــــــــــــــ عمر خرج بره لابوه اللي مستنيه برا الاوضه المنياوي: هدت شويه؟ عمر: ااه نامت، بقولك ايه، انت متأكد من الحوار اللي قولتولي عليه دا؟ المنياوي: حوار ايه؟ عمر: انها فعلا عملت كدا؟ المنياوي، طبعا، هنتبلى على بنت زي دي ليه، احنا نعرفها؟ عمر: يمكن عشان تداري على ابنك المنياوي: اسمع، دا اخوك، واظن انت شوفت حالته عامله ازاي، ليه مش بتثق فينا كدا؟ فضل باصصله بنظرات غريبه وهو ساكت، في اللحظه دي جت مامته لما عرفت انهم نقلوها على هنا مامته: الله الله، السنيوره بدل ماتكون بتتجلد دلوقتي جايبينها ترتاح هنا؟ المنياوي: تعبت لما سمعت خبر وفاة ابوها مامته: ايه دا هو مات، ياسبحان الله، ياخي ربنا مش بيسيب حق حد، يلا عقبال الباقي عمر بحده: هو الموت برضو بقى فيه شماته ولا ايه؟ مامته: ومشمتش ليه ياخويا، اللي مرمي هناك دا ابني، روحي، قلبي اتقطع عليه، خليها تدوق من نفس الكاس عمر: اهدي ووطي صوتك مامته: اوعى من وشي كدا خليني اشوفها عمر وهو بيقف قدامها: رايحه فين؟ مامته: هدخل امسح بكرامتها الارض، دي جتلي لحد عندي، هستنى ايه تاني عمر: امي، لو سمحتي ارجعي عند كرم وكفايه كدا مامته: كفايه ايه عمر: البنت تعبانه، مريضه، مصدومه من موت باباها، يعني مش ناقصاكي مامته: واو، وحضرتك بتدافع عنها ليه ان شآء الله، امال لو مكانتش هي اللي حاولت تقتل اخوك عمر: المتهم برئ حتى تثبت ادانته، ولحد دلوقتي لسه بيحققوا معاها، غير كل دا، حتى لو هي اللي عملت كدا، دلوقتي هي مريضه، خلي عندكوا قلب مره واحده في حياتكوا مامته: انت ازاي بتكلمني كدا؟ المنياوي: خلاص خلاص، هي دلوقتي نايمه هتدخلي تعملي ايه، يلا لو سمحتي ولما تصحى ابقي ادخليلها خدها وراحوا اوضة كرم عمر للعسكري اللي واقف ع الباب يحرسها: ياريت متدخلش حد منهم عليها، لو دخلوا هيعملوا مشكله ــــــــــــــــــــــــــــــــــــــــــــــــــــــــ مامت امجد: ازاي يعني تمشي كلامها عليكوا ابوه: اهو اللي حصل، صممت ان مفيش صوان هيتنصب امجد: لولا انها بس ست كبيره، مكنتش سكت ابدا ع القلم دا ابوه: عمتك يا امجد عيب، وبعدين هي في ظرف صعب، من ناحيه فضيحة بنتها ومن ناحيه جوزها اللي مات، مش عارفه تفكر مامته: جابتلنا العار هي وبنتها، دانا حتر معرفتش امشي في السوق زي الخلق، كل الناس عماله تبصلي وتتمقلس عليا، وانا مالي، هي كانت بنتي اللي بتروح شقق؟، خلت سيرتنا على كل لسان، وابوها مات بحسرته امجد: امشي ازاي انا في البلد دي دلوقتي؟، احط عيني في عين الناس ازاي مامته: واحنا مالنا ياخويا، كل البلد عارفه ان ابوها مدلعها، وقال ايه ميهونش عليه يرفضلها طلب، اهي هي اللي طلبتله الموت والحسره ابوه: اهدوا مش وقته، جهز نفسك عشان الصبح هنسافر تاني، لما نشوف اخر الفضايح دي ايه ــــــــــــــــــــــــــــــــــــــــــــــــــــــــ عمر قاعد في الكافيتيريا تحت بيشرب شاي وسرحان عمال يفكر في الموضوع ومش قادر يفهم حاجه، وازاي كل الادله ضدها، وازاي واثقه من نفسها كدا وشويه ويسرح في شكلها ويفتكر نفسه وهو شايلها عشان يوديها المستشفى فاق من شروده بعد مده وطلع عشان يشوفها دخل عندها لقاها لسه نايمه قعد ع الكرسي جنبها وسند ضهره وقعد يتأملها وهو مستغرب، ازاي دي ممكن تعمل كدا فضل يفكر مع نفسه لحد ما ابتدت تفوق فتحت عينيها ببطء وتعب من كتير العياط بصت حواليها لحد ماجت عينيها عليه وهو قاعد قدامها، ووقتها وشها اترسم عليه ملامح العياط، دفنت وشها في المخده وفضلت تعيط عمر بهدوء: امسحي دموعك، انا مقدر جدا اللي انتي فيه، عارف انه صعب، بس انا عايز افهم حاجه، طلاما والدك تعبان من الاساس، ليه عملتي كدا؟ فضلت بصاله وهي ساكته ودموعها بتنزل عمر: لو عندك حاجه عايزه تقوليهالي قوليها ردت وهي بتحاول تاخد نفسها: انا معملتش حاجه، والله العظيم معملتش حاجه، وحياة بابا اللي روحي فيه انا معملتش حاجه، هو بيتبلى عليا، هو اللي عمل كل حاجه عمر: عمل ايه، اهدي وبطلي عياط واحكيلي ايه اللي حصل اداها مناديل وهي اتعدلت وقعدت ع السرير وبدأت تستجمع نفسها وقبل ماتنطق اي كلمه الباب اتفتح بقوه واترزع في الحيطه دخلت مامته وهي على وشها غضب كبير مامته: انتي بقى ست الحسن والجمال، اللي اتجرأت وعملت كدا في ابني؟ دانا هخلي ايامك سودا لسه هتقرب منها راح عمر مسكها عمر: ماما، ايه اللي بتعمليه دا؟ بيان: ماما؟..انت ابنها؟... يعني انت اخو الحيوان دا مامته: ولسه بتقول عليه حيوان الجربوعه اللي دايره على حل شعرها دي بيان: اخرسي قطع لسانك، اياكي تقولي في حقي نص كلمه مامته بعصبيه: قطع لسان مين يامنحطه، امال لو مكنتيش بنت شوارع بيان: بقولك ايه، انا العفاريت كلها بتتنطط ف وشي، غوري من وشي والا هعمل حاجه نندم عليها كلنا مامته: شايف؟، شايف بتهددني ازاي؟، عشان تعرف، دي مجرمه، مكانها السجن عمر بعصبيه: بس خلاص انتوا الاتنين، لو سمحتي اخرجي بره مامته: لا مش خارجه، لازم اشرب من دمها الاول بيان: ليه!، ها، انتوا هتكدبوا الكدبه وتصدقوها؟، ماكلنا عارفين انكوا طابخين الموضوع سوا، وانكوا بتداروا عليه عشان شكلكوا قدام الناس، لبستوني انا القضيه ع الرغم اني مظلومه، وابنك قليل الحيا هو اللي اعتدى عليا وقل ادبه عمر: ايه!، اعتدى عليكي؟ بيان: مثل، مثّل انت كمان، هستنى منك ايه، مانت ابنهم، نفس الطينه ونفس الوسا*خه، اتفوو عليكوا عيله مقرفه مامته: لا، لا دي زودتها قوي عمر بص لمامته بصه كانت كفيله انها تسكتها، بعدها اتحرك ناحية بيان بخطوات بطيئه عمر: انا صحيح من العيله دي، وصحيح دا اخويا، ولكن صدقيني انا معرفش اي حاجه غير اللي اتكتب في الاخبار، موضوع الاعتداء دا اول مره اعرفه دلوقتي منك مامته: عمر، انت اتجننت!، هتكدب اخوك وتصدق واحده بيئه من الشارع؟ عمر بحده: اتفضلي بره مامته: ايه؟ عمر بصلها بس وهي خدت شنطتها وخرجت، رجع قعد قدام بيان عمر: ممكن تحكيلي كل حاجه بالتفصيل بيان بتهكم: ليه، هتعمل ايه، عشان تكدبني زيهم؟ عمر: لو عايز اكدبك مش هسمع منك حاجه، بس انا عايز اسمع، يلا سامعك بيان: انت فعلا متعرفش؟ عمر: لا بيان: مش مصدقاك، بس هقولك، اخوك المحترم حاول يتعرف عليا بالقوه، بالغصب، ولما تمادى معايا ضربته بالقلم قدام الجامعه كلها اخوك كان فاكر ان كل البنات سهله ورخيصه، بس ميعرفش ان هو اللي رخيص وتافه، ضربته بدل القلم اتنين، ولو تجيلي فرصه تانيه مش هخلي فيه حته سليمه، بعدها سبت الجامعه وخرجت وهو خرج ورايا عشان يردلي القلم لان يحرام كرامته اتهانت قدام الناس، بس وقتها قال يعتدي عليا افضل، واهو منه يعمل شبح وروش قدام اصحابه، زقيته وطلعت اجري، عارف عمل ايه؟، فتح عليا مطو*اه، طلع يجري عليا بيها، وهو بيعدي الطريق العربيه خبطته، انا كنت واقفه الناحيه التانيه اصلا، يعني هو كان بعيد لما العربيه خبطته، كان في نص الطريق، كل دا حصل قدام الجامعه والناس كلها، صدقني هو دا اللي حصل كان قاعد بيسمعها ومركز معاها جامد، وبينه وبين نفسه شاف ان حكايتها اكثر منطقيه من حكاية اهله لانه عارف اخلاق اخوه كويس كان قاعد وباصصلها بملامح فيها جمود بيان: ساكت ليه!، كنت عارفه اكي... عمر: ليه محدش شهد معاكي بيان: معرفش، بس اللي عرفته ان كلهم قالوا نفس السيناريو اللي ابوك واخوك ألفوه، اكيد خوفوهم، محدش يقدر يلعب مع ناس زيكوا، كل واحد هيقول انا مالي، طب تقدر تقولي ليه كل اللي شهدوا ضدي هما صحاب كرم؟، هما الشله اللي كنت بشوفه معاهم؟ عمر: طيب مفيش دليل، اي حاجه تثبت كلامك دفنت وشها بين رجليها وعيطت بيان: مش معايا حاجه، انا عايزه ابويا، عايزه اروح لابويا، هو هيعرف يحميني منكوا عمر حس انها صعبت عليه، ولسبب غير معلوم كان حاسس بالصدق في كلامها، سابها وقام عشان يخرج وصل لحد الباب بس وقفه صوتها.. بيان: هتوديني عند ابويا؟ ـــــــــــــــــــــــــــــــــــــــــــــــــــــــــــــــ تقى: بتعملي ايه يماما مامتها: هنروح لاختك تقى: سمعت امجد بيقول انها في السجن، هنروحلها السجن مامتها: لا، هنروح نخرجها، اختك معملتش حاجه تقى: امال ليه الناس بتقول عليها كدا مامتها: بيقولوا ايه تقى: بيقولوا انها بتعمل حاجات وحشه خالص، وانها كانت هتقتل ابن الراجل دا مامتها: لا اختك معملتش حاجه، اوعي تصدقي اي حد يقول اي كلمه على اختك، اختك احسن من الناس دي كلها، فاهمه؟ تقى: حاضر مامتها: يلا لمي حاجتك كلها ــــــــــــــــــــــــــــــــــــــــــــــــــــــــــــ ‏الظابط: للاسف ي استاذ عمر، الكاميرات كلها مش جايبه حاجه ‏عمر: بايظه يعني؟ ‏الظابط: لا شغاله، بس اليوم دا تقريبا مكانتش شغاله، لانها مش مصوره اللي حصل ‏عمر: ودا منطقي يباشا؟ ‏الظابط: حضرتك احنا دورنا كويس جدا وحقيقي ملقيناش حاجه، بس اتطمن حضرتك، مش محتاجين كاميرات اساسا كل الشهود شهدوا معاكوا ‏عمر: ممكن اعرف اسماء الشهود دول ‏الظابط: ااه طبعا ‏وراله اسماء كل الشهود ‏عمر: ااه، كلهم صحاب كرم ‏الظابط: قصدك ايه ‏عمر: لا ولا حاجه، التحقيق اتقفل ولا لسه ‏الظابط: تقريبا كدا يفندم ‏عمر: طب والراجل صاحب العربيه؟ ‏الظابط: حققنا معاه وقال ان هو اللي جري على الطريق فجأه، بس بعدها غير اقواله وقال ان البنت دي هي اللي زقته ‏عمر: ودا ليه؟ ‏الظابط: مش عارف، بس قال مكنتش مركز عشان كدا اتلغبطت، لكن اتطمن، كل حاجه في صالح كرم بيه ‏عمر: لا اتمنى ترجعوا تحققوا تاني من غير اي ثأثيرات خارجيه ‏الظابط: انا حقيقي مش فاهم قص.. ‏عمر: شوف شغلك كويس، دا اللي انا عايزه ‏ــــــــــــــــــــــــــــــــــــــــــــــــــــــــــــــ ‏كرم: دافع عنها ازاي يعني ‏مامته: يبني طردني من الاوضه ودافع عنها ومخلانيش حتى اعرف اتكلم ‏كرم: يماما ممكن يصدقها، وقتها هعمل ايه ‏مامته: مفيش حاجه تثبت كلامها، كل حاجه تثبت كلامنا احنا ‏كرم: ربنا يستر، انا مكنتش عايزه ييجي اساسا ـ ليه مكنتش عايزني اجي؟ بصوا وراهم لقوه عمر كرم: لا قصدي يعني عشان متتعبش نفسك، مش مستاهله انا كويس عمر: امال ابقى اخوك ازاي بس كرم: ياسيدي نورت، انا بس عامل على تعبك عمر: بقولك يماما مامته: نعم عمر: انتي مش هتروحي ولا ايه مامته: ليه عمر: من ساعة اللي حصل وانتي هنا، روحي ارتاحي ونامي شويه وبعدين تعالي ‏مامته: لا مقدرش اسيبه ‏عمر: مانا معاه اهو، دا غير انه بقى كويس يعني وفي ممرضات بتهتم بيه، يلا بس اسمعي الكلام ‏مامته: ايوا بس.. ماشي، بس اعمل حسابك انا لسه هحاسبك على الطريقه اللي كلمتني بيها قدام البتاعه دي مشت من المستشفى وهو قعد قدام كرم اللي اتوتر لما شاف نظرات عمر ليه ـــــــــــــــــــــــــــــــــــــــــــــــــــــ امجد: انا مش فاهم هتيجي معانا تعملي ايه مامتها: ملكش دعوه، دي بنتي، مليش حاجه هنا ابو امجد: اقعدي في بيتك وكفايه فضايح، احنا هنروحلها مامتها: بقولكوا ايه، لو مش هتاخدونا معاكوا هروح لوحدي امجد: هتقعدوا فين دلوقتي يعني مامتها: اي نيله سودا مش هتفرق ركبوا معاهم العربيه وخدهم على بيان امجد: خليكوا هنا لحد ما اشوف ينفع نشوفها تاني ولا لا دخل امجد جوا وعرف منهم انها اتنقلت المستشفى لانها تعبت امجد: في المستشفى مامتها: يالهوي، مستشفى ليه؟ امجد: تعبت بعد خبر وفاة جوزك مامتها: اللهم اني لا اسالك رد القضاء ولكني اسألك اللطف فيه، اطلع يبني بسرعه قبل قلبي مايقف طلعوا ع المستشفى ودخلت لبيان اللي كانت نايمه ع السرير وبتعيط ــــــــــــــــــــــــــــــــــــــــــــــــــــ عمر: اسمع بقاا، بصراحه كدا الموضوع مدخلش عليا، يعني تيجي معايا ‏دوغري كدا خليك صريح ‏كرم: في ايه انا عملت ايه ‏عمر: لا ماهو دا سؤالي، انت اللي هتقولي عملت ايه ‏كرم: معملتش حاجه ‏عمر بحده: كرم ‏كرم: انا مش فاهم انت بتتكلم عن ايه ‏عمر: بيان، انا عرفت الحقيقه ‏كرم: طبعا سمعت منها وصدقتها ‏عمر: اصل بصراحه اللي حكتهولي مقنع اكتر، يعني تعالى نفكر بالمنطق كدا سوا، انت واحد وس*خ، بتاع بنات، وبيني وبينك كدا انا وانت عارفين انك ليك في اي شئ مؤنث، عايز تقنعني ان لما دي جت تقولك انها معجبه بيك انت رفضتها؟، دا ب اي منطق! ‏كرم: انا عارف اني صايع، بس البنت دي انا خدت منها اللي انا عايزه، وبعد كدا خلاص يعني رميتها زي غيرها، زهقت منها الصراحه، بس هي بقاا فضلت لازقه فيا ومصممه نعمل دا تاني وانا الصراحه اتقفلت منها لانها معجبتنيش ‏عمر: وايه كمان ‏كرم: لو مش هتصدقني يبقى بلاش تخليني احكي من الاساس ‏عمر: يعني هي راحتلك الشقه فعلاً! ‏كرم: ااه ‏عمر: يعني هي مش بنت؟ ‏كرم: وانا هعرف من... ااه ااه مش بنت، ماهي كانت معايا ف الشقه هتبقى بنت ازاي ‏عمر: يعني لو روحت كشفت عليها وطلعت بنت، هتقول ايه ‏كرم: انا بقولك مش بنت، هو انا لمؤاخذه ولا ايه، كانت معايا وقضينا ليله سوا، خلصت ‏عمر: طيب، هروح اخدها ونكشف عليها، ولو طلعت مش بنت، دا هيدل على ان شهادتك كان فيها معلومات غلط ‏كرم: اا.. ازاي يعني ‏عمر: كرم، انا عارف ان البنت دي معملتش حاجه، ودلوقتي هتحكي بالذوق ولا اخليك تحكي بطريقتي ‏كرم: عمر انا قولت اللي عندي، ولو سمحت امشي ورجعلي ماما ‏عمر: يروحييي، يعني مش عايز تحكي! ‏كرم: معنديش حاجه احكيها ‏عمر: طيب، بما ان انت مؤمن اوي بالعدل كدا وان لازم ترجع حقك، اروح اعترف عليك بإن انت اللي عملت كدا في المصنع.. ‏كرم: عمر انت اتجننت؟ ‏عمر: لا، انا بس مؤمن بالعدل زيك ‏كرم: هتبيع اخوك؟ عمر قرب منه ومسكه من شعره وبإيده التانيه من رقبته عمر: اسمع يلا، انا خلقي ضيق، وبصراحه كدا انا دلوقتي اتأكدت انك كداب وان البت دي معملتش حاجه كرم: وايه اللي خلاك متأكد كدا عمر: بصراحه مستبعدش منكوا اي حاجه، انا عارف انتوا تقدروا تعملوا ايه، وبعدين انا شوفت البنت، احلى من كل البنات اللي ممكن واحد زيك يعرفهم، يعني حوار اتقفلت منها دا مش منطقي كرم: يااه، انت بتقول عليها حلوه، للدرجادي!، هي غسلت دماغك ولا ايه عمر: معنديش وقت اضيعه معاك، هتنجز ولا اروح اعترف عليك؟ كرم: طيب خلاص خلاص، عمر انت عارف لو ابويا عرف موضوع المصنع دا هيحصل ايه، دا غير الانتخابات دي عمر: كل دا ميهمنيش كرم: طيب خلاص، هقولك الحقيقه بس اوعدني مش هتعمل حاجه ولا هتقول لحد ع موضوع المصنع ـــــــــــــــــــــــــــــــــــــ امجد: بيان، مامتك جت دخلت مامتها واول ماشافوا بعض الاتنين انهاروا من العياط وطلعت تجري عليها حضنتها مامتها: ليه كدا يبنتي بس، حرام عليكي، ليه عملتي كدا بيان: يماما وحياتك عندي ماعملت حاجه، وحياتك هو اللي كداب، هو اللي حاول يعتدي عليا والعربيه خبطته، صدقيني انا محاولتش اعمله حاجه مامتها بصدمه: حاول ايه؟ يعتدي عليكي؟ بيان: ايوا، زقيته وطلعت اجري راح جري ورايا والعربيه خبطته، والله العظيم ماليا دعوه بحاجه مامتها: مقولتليش ليه كدا، مانا رنيت عليكي يبنتي ليه خبيتي بيان: مكنتش عايزه اخوفكوا عليا، كمان عشان خاطر بابا ميتعبش مامتها بعياط: ميتعبش ايه يبيان، ابوكي خلاص، اكتفى من الظلم اللي شافه في الدنيا دي بيان: لا يماما متقوليش كدا بالله عليكي، انا متأكده انهم بيضحكوا عليا مامتها: لا، ربنا يرحمه، المهم طمنيني عليكي، حد فيهم عملك حاجه؟ بيان: لا يماما، بس مشيني من هنا، مشيني انا معملتش حاجه مامتها: طب هما ليه قالوا عليكي كدا بيان: عشان يلبسوني انا التهمه يماما، عشان المنياوي مش عايز يشوه صورة ابنه، انتي عارفه اخلاقي وتربيتي كويس مامتها بغضب: دانا هشرب من دمه، اشوفه بس ومش هخلي فيه حته سليمه ـ ليه يمدام، انا عملت ايه بصوا ع الباب لقوا المنياوي مامتها: عملت ايه؟ دانا جوزي مات بسببكوا، منكوا لله المنياوي: واحنا مالنا، ماتشوفي بنتك اللي متربتش دي دخل عمر لقاهم جوا وامجد وابوه برا مع الظابط مامتها: انت ابنه بقا؟ عمر: ااه بصوا لقوها قفلت الباب بسرعه من جوا وقلعت الجزمه اللي في رجلها ونزلت فيهم هما الاتنين ضرب وبيان تنحت للي بيحصل بيان: ماما بتعملي ايه مامتها وهي بتضربهم: اسكتي انتي، انا عارفه الاشكال دي كويس، لازم ياخدوا بالجزمه عشان يتربوا المنياوي وهو بيخبي وشه: اللي بتعمليه دا غلط يمدام، صدقيني هوديكي ف داهيه مامتها: داهيه لما تاخدك انت وابنك، وانت كمان، دانا هشرب من دمك عمر وهو كمان بيحاول يخبي وشه من الضرب: وانا مالي طيب، استني بس هفهمك مامتها: تفهمني ايه، منكوا لله، ربنا ينتقم منكوا، دانتوا مش بني ادمين عمر مسك ايديها وفرد ضهره قدامها وهما بينهجوا عمر: انا معملتش حاجه، ماتهدي بقى راحت فلتت ايديها منه وضربته بالجزمه على وشه ف اللحظه اللي الظابط كسر فيها الباب ودخل... يُتبَع...